Síðast liðinn fimmtudag 14.apríl brugðum við undir okkur betri skónum og gengum Súðavíkurhringinn sem er 3,5 km. Allir nemendur og starfsfólk Súðavíkurskóla tóku þátt. Flestir fóru hringinn en aðrir fóru veginn og enduðu allir í Raggagarði þar sem borinn var fram morgunmatur í góðu veðri. Endilega njótið myndanna í albúmi sem ber nafnið Vorganga 2016. 

Árshátíð Súðavíkurskóla tókst glæsilega vel. Allir nemendur skólans tóku þátt í verkinu um konungsdótturina sem ekki gat sofið. Jóhanna Rúnarsdóttir kennari í tónlistardeild skólans sá um útfærslu á tónlistinni í verkinu, kennarar skólans sáu um uppsetningu sviðs og útfærslu sem og alla búninga, auk allra æfinga. Starfsmenn leikskólans sáu um æfingar hjá sínum nemendum. Ég vil þakka öllu þessu frábæra starfsfólki Súðavíkurskóla fyrir þeirra framlag og auðvitað nemendum skólans fyrir hreint út sagt frábærann leik.

Ekki má gleyma að þakka foreldrum sem sáu um kaffihlaðborð að sýningu lokinni. Þar svignuðu borðin af þvílíkum hnallþórum og öðrum kræsingum.  Kærar þakkir til ykkar allra, þið stóðuð ykkur með sóma.

Næsta laugardag 5.mars verður árshátíð Súðavíkurskóla haldin í Samkomuhúsinu. Að þessu sinni sýnum leikritið um Andvaka kóngsdótturina eftir Þórunni Pálsdóttur, sem hefur verið aðlagað fyrir okkar skóla.  Sýningin hefst klukkan 14:00 og er áætlaður sýningatími tæp klukkustund, allir nemendur skólans koma að sýningunni og hafa lagt mikið kapp á æfingar og allan undirbúning. Að sýningu lokinni býður foreldrafélagið upp á kaffihlaðborð á sal skólans. Aðgangseyrir fyrir sýningu og kaffihlaðborð er frítt fyrir leikskólabörn, 700.-kr fyrir grunnskólanemendur og 2000.-kr fyrir fullorðna. Ágóðinn rennur til nemendafélags skólans. Þar sem ekki verður boðið upp á kortagreiðslu eru allir beðnir að muna eftir pening til að greiða aðgangseyri.

Allir hjartanlega velkomnir